د سرحدونو، قومونو او قبایلو چارو وزارت له TLO موسسې سره په بېلابېلو برخو کې د همکاریو هوکړه لیک لاسلیک کړ

د سرحدونو، قومونو او قبایلو چارو وزارت او د اړیکو دفتر موسسې یا (TLO) ترمنځ د عامه پوهاوي غونډو، د شخړو د هوارې او د ولسي خلکو د ستونزو د تشخيص په برخه کې د دوه اړخیزو همکاریو په موخه هوکړه لیک لاسلیک شو.
دغه وزارت په یوه خبرپاڼه کې ویلي، چې د دغې ناستې پرمهال د یاد وزارت د جرګو او قبایلي چارو د همغږۍ مرستیال ملا عبدالخالق عابد، مسلکي مرستیال مولوي احمد طه قادري، د وزارت نورو رئیسانو او د اړیکو د دفتر مرستیال عبدالرحیم خُرم او مل پلاوي حضور درلود.
د یادې غونډې پیل کې عبدالرحیم خُرم د دې هوکړه لیک موخه د یاد وزارت له پالیسیو سره سم د ولس او قومونو سره نږدې والی او د هغوی ستونزې حل کول یاد کړل او ویې ویل، د اړیکو دفتر یو غیر دولتي بنسټ دی چې د ولس او حکومت ترمنځ د ښو اړیکو رامنځته کولو، د قومي شخړو حل، په ولایتونو کې د همغږۍ غونډو جوړولو، د مرکچي قومي سپین ږیرو د ظرفیت لوړونې او نورو برخو کې کار کوي او له دې وزارت سره به په اړوندو برخو کې په مرکز او ولایاتو کې خپل کارونه مخ ته وړي.
ورپسې د جرګو او قبایلي چارو د همغږۍ مرستیال ملا عبدالخالق عابد راغلي پلاوي ته هرکلی وکړ او ویې ویل، چې په هېواد کې اسلامي نظام قائم دی، خلک د یووالي په ټغر ناست او د ټولو مېشتو قومونو حقوق خوندي دي.
عابد د هوکړه لیک مادو ته په اشارې سره وویل، چې زموږ او تاسې موخه ټول ولس او خلکو ته خدمت او دوی ته آسانتیاوې برابرول دي.
نوموړي ډاډ ورکړ، چې د اسلامي امارت ټولې ادارې او مسئولین اطاعت ته ژمن دي او د هېواد په هره برخه کې به ستاسې کړنې په ښه ډول مخ ته ځي او حکومت به مو همکاري کوي.