ملا نورالله نوری: د افغان ولس له قربانیو د نړۍ خلکو د ازادۍ فکر اخیستی او له خپلو حکومتونو خپلواکي غواړي

زابل کې د سرحدونو، قومونو او قبایلو چارو وزارت سرپرست ملا نورالله نوری د یوه پلاوي په مشرۍ د مرکز قلات په شمول د ټولو ولسوالیو له قومي مشرانو او دیني عالمانو سره ناسته کړې.

د ولسونو په استازولي څو تنو قومی مشرانو او دیني عالمانو د ورغلي پلاوي تر هرکلی کولو وروسته ویلي؛ ۴۸ کاله وروسته افغانان د امن پر ټغر را ټول دي، چې دا د دې ولس د همکاري برکت دی.

نوموړو زیاته کړې؛ موږ د خپلو قربانیو احسان پر چا نه اچوو، په تېر ۲۰ کلن انقلاب کې قربانۍ ورکول زموږ اسلامي وجیبه وه او د اوسني حاکم نظام ساتل هم خپل مسؤلیت بولو.

دوی د اسلامی امارت په راتګ سره د هر چا د مال او عزت د خوندیتوب په اړه هم خبرې کړي او په یاد ولایت کې د خلکو د ستونزو د حل غوښتنه  یې کړې.

سرپرست وزیر د اسلامی امارت بریا ته رسېدل د ولسونو د ملاتړ برکت یاد کړی او ویلي يي دي؛ د افغانستان د مجاهد ولس له قربانۍڅخه د نړۍ خلکو د ازادۍ فکر اخیستی او له خپلو حکومتونو څخه ازادي او خپلواکي غواړي.

نوموړي زیاته کړې؛ افغانستان د اقتصاد له پلوه په ځان بسیاینې ته نږدې دی، ځکه د دې هېواد کانونه او د اوبو مدیریت زموږ د هېوادوالو ټولې اړتیاوې پوره کولای شي او زه دا ډاډ درکوم، چې په راتلونکي کې به افغانستان د نړۍ هیڅ هېواد ته محتاج نه شي.