د ختیځ زون په سطحه درواني ناروغانولپاره لېونتون پرانستل شو
د رجب المرجب پر ۱۶مه د افغاني سرې میاشتې له لوري ننګرهار ولایت کې د ختیځ زون په کچه د رواني ناروغانو لپاره د لیونتون پرانیسته وشوه.
د رجب المرجب پر ۱۶مه د افغاني سرې میاشتې له لوري ننګرهار ولایت کې د ختیځ زون په کچه د رواني ناروغانو لپاره د لیونتون پرانیسته وشوه، چې په کې به د ۱۵۰ رواني ناروغانو د ساتنې ترڅنګ د دوی درملنه او پالنه هم کېږي. غونډې ته د افغاني سرې میاشتې سرپرست عمومي رئیس ښاغلي مولوي مطیع الحق خالص په خپله وینا کې وویل «له ډېره وخته مو هوډ و، چې د هېواد په کچه د رواني ناروغانو د درملنې او ساتنې مرکزونه ایجاد کړو؛ له نیکه مرغه وتوانیدو نن خپل هوډ ته د عمل جامه ور واغوندو او په ننګرهار ولایت کې د ختیځ زون په کچه د نارینه او ښځینه رواني ناروغانو د ساتنې، پالنې او درملنې مرکز پرانیزو».
نوموړي وویل «مونږ هڅه کوو ددې مرکز له لارې د هغو بې وسو وګړو لاسنیوی وکړو، چې د خپلې کورنۍ د رواني ناروغانو درملنه، پالنه او ساتنه نشي کولی؛ مونږ څو نورو زونونو کې هم دغه ډول مرکزونه ایجاد کړي».
ښاغلي مولوي مطیع الحق خالص وویل «پر بډایه وګړو غږ کوم، چې یو او بل ته لاس ورکول دا کړیدلی ولس له کړاوونو او بېوزلۍ ژغورلی شي؛ باید بډایه وګړي د ولس د بېوزلو وګړو لاسنیوی وکړي، ځکه ددې هېواد د بېوزلو مرسته یوازې د حکومت او بهرنیو مرستندویو ادارو مسؤلیت ندی، بلکې باید ددې هېواد بډایه وګړي هم د اړمنو لاسنیوی وکړي». نوموړي وویل «د بهرنیو مرستې مونږ په پښو نشي درولی؛ باید په خپله لاس په کار شو او دا ولس وژغورو».
ښاغلي مولوي مطیع الحق خالص وویل، چې ډېر زر به په ننګرهار ولایت کې له سوالګرو سره د میاشتینۍ نغدي مرستې بهیر پیل کړي.
غونډې ته د یو شمېر نورو مسؤلینو ترڅنګ د افغاني سرې میاشتې د کورنۍ پلټنې رئیس مولوي محمد نسیم احمدي په خپلو خبرو کې وویل «مونږ به په دې مرکز کې د رواني ناروغانو پالنه او درملنه د خپلو کورنیو له غړو هم ښه کوو».
غونډې ته د ننګرهار د امنیه قومندانۍ مرستیال شیخ تاج الدین او د ننګرهار ولایت استازي مولوي عارف او یو شمېر نورو مسؤلینو په خپلو ویناو کې له افغاني سرې میاشتې سره د همکارۍ ډاډ ورکړ.
د غونډې په پای کې هغو وګړو ته ستاینلیکونه ورکړل شول، چې ددې مرکز د امورو په ترسره کولو کې یې نه ستړې کیدونکې هلې ځلې کړې وې.
