بیماران «لب‌چاک و کام‌چاک» در بامیان رایگان تداوی می‌شوند

بیماران «لب‌چاک و کام‌چاک» در بامیان، توسط یک پزشک در شفاخانه‌ی ولایتی این ولایت، رایگان تداوی می‌شوند.

روند درمان این بیماران توسط عبدالغفار غیور، داکتر در شفاخانه‌ی ولایتی بامیان، از سه روز به این سو در این شفاخانه آغاز شده است.

تا کنون، نزدیک به ۳۵ بیمار لب‌چاک و کام‌چاک در شفاخانه‌ی ولایتی بامیان ثبت شده اند و به زودی درمان خواهند شد.

عبدالغفار غیور، می‌گوید که بامیان یک ولایت دوردست و با کم‌بود متخصصان درمان بیماری لب‌چاک و کام‌چاک روبه‌رو است. به گفته‌ی او، بسیاری از خانواده‌ها به دلیل ناداری نمی‌توانند بیماران شان را برای درمان به کابل یا بیرون از کشور ببرند؛ به همین دلیل، او به بامیان آمده تا بیماران را رایگان درمان کند.

در همین حال، عبدالله سرحدی، والی بامیان، می‌گوید که قرار است با تلاش‌های وزارت صحت عامه و مسئولان صحی در بامیان، همه‌ی کودکان، نوجوانان و جوانان در این ولایت که از بیماری لب‌چاک و کام‌چاک رنج می‌برند، در شفاخانه‌ی ولایتی بامیان رایگان درمان شوند.

گفتنی است که روند درمان بیماران لب‌چاک و کام‌چاک در بامیان، از دوشنبه، ۲۲ عقرب، آغاز شده است و تا ۲۵ عقرب ادامه می‌یابد.