د ریاست الوزرا سیاسی مرستیال: د هېواد فرهنګي او کلتوري وضعیت ته به پاملرنه وشي

د ریاست الوزرا سیاسي مرستیال مولوي عبدالکبیر د هېواد له نوموتي لیکوال او څېړونکي استاد محمد آصف صمیم سره وکتل.
استاد محمد آصف صمیم د هېواد د روان وضعیت په اړه خپلې مشورې او وړاندیزونه او د فرهنګیانو ستونزې د ریاست الوزرا له سیاسي مرستیال سره شریکې کړې. دغه راز یې د افغانستان په فرهنګي وضعیت خبرې وکړې او دې برخې ته یې د ډېرې پاملرنې غوښتنه وکړه.
په ورته وخت کې د ریاست الوزرا سیاسي مرستیال مولوي عبدالکبیر په دغه کتنه کې له استاد صمیم څخه ادبیاتو ته د هغه د کړيو خدمتونو ستاینه وکړه او ويې ویل چې د هېواد فرهنګي او کلتوري وضعیت ته به پاملرنه وشي. د یو بل خبر له مخې د رياست الوزرا سیاسي مرستیال پرون په خپل کاري دفتر کې د پکتیا له مرستيال والي انعام الله صلاح الدين سره وکتل.
نوموړي د پکتیا د عمومي وضعيت او ترسره شوو رغنیزو پروژو په اړه معلومات ورکړل او ویې ويل چې په دې ولایت کې ټول مېشت قومونه د ځايي ادارې همکار دي او د اړوندو ادارو ترمنځ ښه همغږي رامنځته شوې ده.
د رياست الوزرا سیاسي مرستیال، پکتیا د هېواد مهم ولايت ياد کړ او د چارو لا ښه والي په موخه يې مرستيال والي ته يو شمېر لارښوونې هم وکړې.