د هېواد معادنو په فني او مسلکي ډول استخراج ته ژمن
د کانونو او پټرولیم وزارت د پلان او پالیسي مرستیال شیخ الحدیث ضیاالرحمن اریوبي پکتیا ته د خپل سفر په ترڅ کې د دې ولایت له والي ملا مهرالله حماد سره لیدنه کړې.
د کانونو او پټرولیم وزارت د پلان او پالیسي مرستیال شیخ الحدیث ضیاالرحمن اریوبي پکتیا ته د خپل سفر په ترڅ کې د دې ولایت له والي ملا مهرالله حماد سره لیدنه کړې.
په دې لیدنه کې د کانونو او پټرولیم وزارت د پلان او پالیسي مرستیال ویلي؛ افغانستان د معادنو په برخه کې خورا بډایه او زیات معادن لرونکی هېواد دی، چې پر وینا یې د دې معادنو حفاظت، په فني او مسلکي ډول استخراج، په قرارداد ورکول او په سمه توګه څارنه یې مهمه ده.
نوموړي زیاته کړې، اسلامي امارت د دې معادنو په ښه ډول استخراج لپاره زیاته توجه کړې او لا هم په دې باندې کار روان دی.
د اریوبي په وینا په لویه کچه د څو وزراتونو څخه یوه ګډه کمېټه جوړه شوې، څو د معادنو د قاچاق او تخریب مخنیوي وشي، چې د یادې کمېټې لخوا بیا په هر ولایت کې د اړوند ریاستونو څخه ولایتي کمېټې جوړې شوې، چې د محافظت معادن په نوم به یادې کمېتې خپلې چارې مخته وړي او د معادنو په برخه کې شته ستونزو او اړتیاوو ته به رسیدنه کوي.
د پکتیا والي ملا مهرالله حماد ویلي، معادنو د هېواد لپاره یوه لویه سرمایه ده او په دې برخه کې یې د اسلامي امارت وروستۍ هڅې او لاسته راوړنې بې سارې دي.
نوموړي زیاته کړې؛ پکتیا هم د معادنو په برخه کې هغه ولایت دی، چې حساب پرې کېږي او د دې لپاره یې د مرکزي ادارې پاملرنه مهمه بللی، څو دغه معادنو په ښه ډول استخراج او د هېواد د بیارغونې په برخه کې ترې استفاده وشي.
پکتیا والي ډاډ ورکړی، چې د معادنو د څارنې او حفاظت په موخه ټاکل شوې ولایتي کمېټې سره به په بشپړ ډول همکار وي او وخت په وخت به ورسره د ستونزو هواري په موخه ناستې ولري.
