ډاکتر ملا عبدالواسع: کوچیانو د هېواد د عزت، سرلوړۍ او ازادۍ کې خپله ایماني او وجداني دنده ترسره کړې

د ریاست الوزرا د دفتر لوی رییس ډاکتر ملا عبدالواسع د لغمان ولایت یو شمېر مخورو سره لیدنه کړې.

د سیاسي او ولسي چارو رییس مولوي ګلزار احمدحقاني ویلي؛ افغانانو د هېواد په هره برخه کې د اسلامي نظام د ټینګښت او د اشغال پای ته رسیدو لپاره قربانۍ ورکړي او د کوچیانو رول په دې کې پیاوړی وو.

یادو مشرانو د افغانستان اسلامي امارت ټینګښت د افغانانو لپاره لویه لاسته راوړنه بللې.

کوچي مشرانو د څړځایونو، ښوونې او روزنې، د ښوونځیو، مدرسو جوړولو، د روغتیایي او حیواني کلینیکونو او سرکونو جوړولو په اړه خپلې ستونزې او وړاندیزونه د ریاست الوزرا د دفتر لوی رییس سره شریک کړي او د حل غوښتنه یې کړې.

د ریاست الوزرا د دفتر لوی رییس ویلي، په تېرو ۲۰ کلونو کې خلک د هېواد په هره برخه کې له ستونزو سره مخ شوي وو او د کوچیانو په ګډون ټولو خلکو د اسلامي نظام د برقرارۍ لپاره قربانۍ ورکړي.

ډاکتر ملا عبدالواسع زیاته کړې؛ اسلامي امارت د خلکو ستونزو ته رسېدنه کړې او د هغوی ملاتړ کوي، نو خلک هم باید له خپل اسلامي نظام سره همکار وي.

نوموړي ویلي؛ کوچیان زیارکښه خلک دي چې د هېواد د عزت، سرلوړۍ او ازادۍ په لاره کې یې خپله ایماني او وجداني دنده ترسره کړې.

د هېواد د ابادي او ارامي لپاره باید له خپلو شخصي ګټو تېر شو او ملي ګټو ته لومړیتوب ورکړو.

د ریاست الوزرا د دفتر لوی رییس په وینا، د اسلامي امارت مسولین خلکو ته د خدمت او د هغوی د ستونزو د حل په برخه کې هره ورځ هلې ځلې کوي.