د بلخ ولایت د دولت آباد ولسوالۍ په قرشي ګک سیمه کې د دوو کورنیو ترمنځ ۴ کاله مخکې پېښه شوې شخړه د یادې ولسوالۍ د شخړو د حل کمېسیون، قومي سپین ږیرو او د سرحدونو، قومونو او قبایلو چارو ریاست په همغږۍ او هڅو حل شوه. د یادې دښمنۍ د له منځه وړلو په موخه ټاکل شوي کمېسیون او قومي مشرانو له دواړو لوریو سره جلا جلا غونډې وکړې او ښکېلي غاړې یې روغې جوړې ته چمتو کړې. د مرکې پر مهال دواړه لوریو په تېرو کړنو د پښېمانۍ څرګندولو ترڅنګ ژمنه وکړه چې له دې وروسته به له یو بل سره د وروڼو په څېر ژوند کوي.
