پنتاګون: ډاګیز شوي اسناد ملي امنیت ته زیان رسوي

د امریکا دفاع وزارت (پنتاګون) او ددغه هېواد څارګر سازمانونه سره په ګډه د اوکرایین د جګړې په اړه د لسګونه محرمو اسنادو ډاګیزېدو د څرنګوالي په اړه پر څېړنې بوخت دي. د پنتاګون ویاند کرېس میګر ویلي «ددغو اسنادو افشا کېدل د امریکا ملي امنیت ته «ډېر جدي خطر» دی او د ناسمو معلوماتو له خپرېدو سره مرسته کولی شي». میګر زیاتوي: «موږ لا هم ددغو اسنادو د ډاګیزېدو د څرنګوالي او عامېدو په باب څېړنه کوو». په ډاګیزه شويو اسنادو کې د اوکرایین د جګړې او د امریکا د پوځي ملګرو او چین په اړه د امریکا پوځي معلومات هم شته.دغه اسناد لومړی ځل په تېره مارچ میاشت کې د پیغام رسولو خدمتونو ډسیسکورډ،‌۴چن او ټیلیګرام کې خپاره شول.لا روښانه نه ده چې چا ددغو اسنادو عکس اخیستی او خپاره کړي یې دي.